«ԲԻԿՍԱ» ՍՊԸ-Ի ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 2 ԴԱՏԱԿԱՆ ԿԱԶՄԻ

Ո Ր Ո Շ Ո Ւ Մ Ը

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

Քաղ. Երևան

15 հոկտեմբերի 2010թ.

Հայաստանի Հանրապետության սահմանադրական դատարանի

թիվ 2 դատական կազմը

Նախագահությամբ Ֆ. Թոխյանի

Անդամակցությամբ Հ. Դանիելյանի

Մ. Թոփուզյանի

Քննության առնելով «ԲԻԿՍԱ» ՍՊԸ-ի անհատական դիմումի ընդունելիության հարցը,

ՊԱՐԶԵՑ.

Համաձայն ՀՀ Սահմանադրության 101-րդ հոդվածի 1-ին մասի 6-րդ կետի «ԲԻԿՍԱ» ՍՊԸ-ն 2010թ. հոկտեմբերի 5-ին դիմել է ՀՀ սահմանադրական դատարան խնդրելով ՀՀ քաղաքացիական դատավարության օրենսգրքի 233-րդ հոդվածի 3-րդ մասը ճանաչել ՀՀ Սահմանադրության 3-րդ, 18-րդ, 19-րդ և 92-րդ հոդվածներին հակասող և անվավեր։

Սույն անհատական դիմումի նախնական ուսումնասիրությունը ցույց տվեց, որ

1. ՀՀ քաղաքացիական դատավարության օրենսգրքի «Վճռաբեկ բողոքը վերադարձնելը» վերտառությամբ 233-րդ հոդվածը կարգավորում է վճռաբեկ բողոքի վերադարձման հետ կապված իրավահարաբերությունները։

Դիմողի կարծիքով, նշված հոդվածի 3-րդ մասը վճռաբեկ դատարանին հնարավորություն է տալիս ձևավորել այնպիսի դատական պրակտիկա, համաձայն որի դիմումները վերադարձվում են առանց քննության։ Եվ գործերի ընդունման հարցում դրսևորվող մոտեցման արդյունքում, ըստ դիմողի, անհնարին է դառնում վճռաբեկ դատարանի իրավասությունների շրջանակներում անձանց ՀՀ Սահմանադրության 18-րդ և 19-րդ հոդվածներով նախատեսված իրավունքների պաշտպանությունը։

2. Օրենսգրքի վիճարկվող 233-րդ հոդվածի դրույթները ՀՀ քաղաքացիական դատավարության օրենսգրքի նախկին խմբագրությամբ, շարադրված էին 231.1-րդ հոդվածում, որի վերաբերյալ առկա է ՀՀ սահմանադրական դատարանի 2007թ. ապրիլի 9- ի ՍԴՈ-690 որոշումը։ Մասնավորապես, նշված որոշումով ՀՀ քաղաքացիական դատավարության օրենսգրքի 231.1-րդ հոդվածի 1-ին և 3-րդ կետերի դրույթները (ներկա խմբագրությամբ 233-րդ հոդվածի 1-ին մասի 1-ին և 2-րդ կետերը և 3-րդ մասը) ճանաչվել են ՀՀ Սահմանադրությանը համապատասխանող և հետագայում փոփոխության չեն ենթարկվել։ Հետևաբար, առկա է դիմումի քննության ընդունումը մերժելու «Սահմանադրական դատարանի մասին» ՀՀ օրենքի 32-րդ հոդվածի 3-րդ կետով նախատեսված հիմքը։

Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 32-րդ հոդվածի 3-րդ կետով ՀՀ սահմանադրական դատարանի թիվ 2 դատական կազմը

Ո Ր Ո Շ Ե Ց.

«ԲԻԿՍԱ» ՍՊԸ-ի անհատական դիմումով գործի քննությունը մերժել։

Նախագահող

Անդամներ

15 հոկտեմբերի 2010 թվականի

ՍԴԴԿՈ/2-32