ԱՆԱՀԻՏ ՄՆԱՑԱԿԱՆՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 2 ԴԱՏԱԿԱՆ ԿԱԶՄԻ

ՈՐՈՇՈՒՄԸ

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

Քաղ. Երևան 14 մարտի

2017թ.

Հայաստանի Հանրապետության սահմանադրական դատարանի թիվ 2

դատական կազմը`

Նախագահությամբª Ֆ. Թոխյանի

Անդամակցությամբ` Հ. Նազարյանի

Ա. Խաչատրյանի

Քննության առնելով Անահիտ Մնացականյանի անհատական դիմումի ընդունելիության հարցը,

ՊԱՐԶԵՑ.

Համաձայն ՀՀ Սահմանադրության 101-րդ հոդվածի 1-ին մասի 6-րդ կետի` Անահիտ Մնացականյանը 2017թ. փետրվարի 27-ին դիմել է ՀՀ սահմանադրական դատարան` խնդրելով.

«Գույքահարկի մասին» ՀՀ օրենքի 8-րդ հոդվածի 1-ին մասը ճանաչել ՀՀ Սահմանադրության 1-ին և 79-րդ հոդվածների պահանջներին հակասող»: Սույն անհատական դիմումի նախնական ուսումնասիրությունը ցույց տվեց, որ.

1. Դիմողը գտնում է, որ վիճարկվող դրույթը չի կարգավորում հարկվող օբյեկտի անշարժ գույքի բաժանման դեպքում, մեկից ավելի հարկվող օբյեկտների հարկի հաշվարկման կարգը:

Ըստ դիմողի` վիճարկվող նորմը գույքահարկ գանձող մարմնի և դատական համակարգի կողմից կիրառվել է գույքի բաժանման դեպքում հարկը հաշվարկելու համար` բաժանումը նույնականացնելով օտարման հետ:

Դիմողը պնդում է, որ վիճարկվող դրույթի և առկա դատական որոշումների արդյունքում վտանգվում է նաև պետության/համայնքի գույքային շահը, քանի որ հնարավորություն է տալիս կառուցապատողին շենքի կառուցումից հետո արագ օտարել գույքային բոլոր միավորները զրոյական հարկով, այդ պահին շարունակելով մնալ պարտավոր շենքի գույքահարկի համար, սակայն տարեվերջին հարկային պարտավորության վճարման ժամկետին սնանկանալ:

2. Դիմումի և կից ներկայացված փաստաթղթերի ուսումնասիրությունը ցույց տվեց, որ առկա չեն դիմումի քննությունը մերժելու հիմքեր, քանի որ` դիմումում առաջադրված հարցերը ենթակա են սահմանադրական դատարանին, դիմողն իրավասու է դիմել սահմանադրական դատարան,

դիմումում առաջադրված հարցի վերաբերյալ առկա չէ սահմանադրական դատարանի որոշում,

դիմումի առարկայի վերաբերյալ այլ դիմումի հիման վրա սահմանադրական դատարանում գործի դատաքննություն չի իրականացվում,

դիմողը սպառել է դատական պաշտպանության բոլոր միջոցները:

Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 31-րդ հոդվածով` ՀՀ սահմանադրական դատարանի թիվ 2 դատական կազմը

ՈՐՈՇԵՑ.

1. «Անահիտ Մնացականյանի դիմումի հիման վրա` «Գույքահարկի մասին» ՀՀ օրենքի 8-րդ հոդվածի 1-ին մասի` ՀՀ Սահմանադրությանը

համապատասխանության հարցը որոշելու վերաբերյալ» գործն ընդունել քննության:

2. Սույն գործով դատավարությանը որպես պատասխանող կողմ ներգրավել ՀՀ Ազգային ժողովին:

Նախագահող

Անդամներ

14 մարտի 2017 թվականի

ՍԴԴԿՈ/2-5