ԱՎԵՏԻՍ ԱՓԻՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 1 ԴԱՏԱԿԱՆ

ԿԱԶՄԻ

Ո Ր Ո Շ Ո Ւ Մ Ը

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ

ՎԵՐԱԲԵՐՅԱԼ

Քաղ. Երևան

13 հոկտեմբերի 2015 թ.

Հայաստանի Հանրապետության սահմանադրական դատարանի թիվ 1

դատական կազմը`

Նախագահությամբ` Ֆ. Թոխյանի

Անդամակցությամբ` Ա. Խաչատրյանի

Ա. Թունյանի

Քննության առնելով Ավետիս Ափիյանի անհատական դիմումի ընդունելիության հարցը,

Պ Ա Ր Զ Ե Ց.

Համաձայն ՀՀ Սահմանադրության 101-րդ հոդվածի 1-ին մասի 6-րդ կետի` Ավետիս Ափիյանը 2015թ. սեպտեմբերի 24-ին դիմել է ՀՀ սահմանադրական դատարան` խնդրելով. «Գույքահարկի մասին» ՀՀ օրենքի 8-րդ հոդվածի 2-րդ մասը (ընդունված 2002 թվականի դեկտեմբերի 26-ին ՀՕ-491-Ն օրենքով մինչև 12.11.2013թ. ՀՕ-113-Ն օրենքի լրացումների և փոփոխությունների խմբագրությամբ) ճանաչել ՀՀ Սահմանադրության 1-ին, 31-րդ, 45-րդ և 106-րդ հոդվածներին ներկայացվող պահանջներին հակասող և անվավեր»:

Սույն անհատական դիմումի նախնական ուսումնասիրությունը ցույց տվեց, որ.

1. Դիմողը գտնում է, որ օրենսդրի կողմից սահմանված` խնդրո առարկա իրավակարգավորմամբ գույքահարկի գանձման կառուցակարգն ամբողջական և կանխատեսելի չէ, ինչն էլ, նրա կարծիքով, սույն դեպքում հանգեցրել է իր` սեփականության իրավունքի խախտմանը: Ըստ դիմողի` նշված իրավակարգավորումը չի համապատասխանում իրավական որոշակիության սկզբունքն ամրագրող` ՀՀ Սահմանադրության 1-ին հոդվածին:

2. Դիմումի և կից ներկայացված փաստաթղթերի ուսումնասիրությունը վկայում է, որ դիմողի համար առաջացած անբարենպաստ հետևանքները նրա նկատմամբ կայացված համապատասխան դատական ակտերի արդյունք են:

Փաստորեն, դիմողը, վերոհիշյալ դրույթների սահմանադրականության հարցի վիճարկման պահանջի քողի ներքո իրականում բարձրացնում է դրանց կիրառման իրավաչափության հարց: Համաձայն ՀՀ սահմանադրական դատարանի 2009 թվականի մարտի 17-ի ՍԴԱՈ-21 որոշմամբ սահմանված իրավական դիրքորոշման` բոլոր այն դեպքերում, երբ դիմողը ձևականորեն վիճարկելով օրենքի դրույթի սահմանադրականության հարց, ըստ էության բարձրացնում է այդ դրույթի կիրառման իրավաչափության հարց, ապա այդպիսի դիմումները ենթակա են մերժման` «Սահմանադրական դատարանի մասին» ՀՀ օրենքի 32-րդ հոդվածի 1-ին կետի հիմքով: Հետևաբար, այս առումով առկա է դիմումի քննության ընդունումը մերժելու` «Սահմանադրական դատարանի մասին» ՀՀ օրենքի 32- րդ հոդվածի 1-ին կետով նախատեսված հիմք:

Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 32-րդ հոդվածի 1-ին կետով` ՀՀ սահմանադրական դատարանի թիվ 1 դատական կազմը

Ո Ր Ո Շ Ե Ց.

Ավետիս Ափիյանի անհատական դիմումáí գործի քննության ընդունումը մերժել: Նախագահող

Անդամներ

13 հոկտեմբերի 2015 թվականի

ՍԴԴԿՈ/1-24