ԱՐՄԱՆ ԱՅՎԱԶՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 2 ԴԱՏԱԿԱՆ ԿԱԶՄԻ

Ո Ր Ո Շ Ո Ւ Մ Ը

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

Քաղ. Երևան

24 հունիսի 2014թ.

Հայաստանի Հանրապետության սահմանադրական դատարանի թիվ 2 դատական կազմը`

Նախագահությամբ Կ. Բալայանի

Անդամակցությամբ Ֆ. Թոխյանի

Ա. Խաչատրյանի

Քննության առնելով քաղաքացի Արման Այվազյանի անհատական դիմումի ընդունելիության հարցը,

Պ Ա Ր Զ Ե Ց.

1. Քաղաքացի Արման Այվազյանը 05.06.2014թ. դիմել է ՀՀ սահմանադրական դատարան վիճարկելով ՀՀ քրեական օրենսգրքի 315-րդ հոդվածի 1-ին մասի և ՀՀ քրեական դատավարության օրենսգրքի 309-րդ հոդվածի 2-րդ մասի` ՀՀ Սահմանադրությանը համապատասխանության հարցը:

2. Դիմողի փաստարկները հիմնականում հանգում են հետևյալին. Վիճարկելով ՀՀ քրեական օրենսգրքի 315-րդ հոդվածի 1-ին մասի սահմանադրականությունը` դիմողը նշում է, որ այն «չի համապատասխանում իրավական որոշակիության սկզբունքին»: Ըստ դիմողի` «Որոշակիության սկզբունքը խախտող քրեական օրենքն ի սկզբանե չի պատկանում սահմանադրական իրավակարգին, այն է` օրենք չէ ՀՀ Սահմանադրության 6-րդ հոդվածի 2-րդ մասի 1-ին նախադասության և հատկապես ՀՀ Սահմանադրության 22-րդ հոդվածի 4-րդ մասի իմաստով»: Դիմողի պնդմամբ` օրենսդիրը թույլ է տվել, որ ինքը քրեական պատասխանատվության ենթարկվի մի արարքի համար, որի պատժելիությունը գործող օրենքով հստակ սահմանված չէ: Ինչ վերաբերում է ՀՀ քրեական դատավարության օրենսգրքի 309-րդ հոդվածի 2-րդ մասին, ապա դիմողի պնդմամբ` այն թույլատրելով դատարանին վերաորակել ամբաստանյալին մեղսագրվող արարքը, խախտում է ՀՀ Սահմանադրության 19-րդ հոդվածով երաշխավորված` դատարանի չեզոքության սկզբունքը: Դիմողի պնդմամբ` դատարանն իբրև արդարադատության մարմին իրականացրել է արդարադատության գործառույթի հետ անհամատեղելի գործողություններ:

3. Դիմումի ուսումնասիրությունը վկայում է, որ`

• դիմումում առաջադրված հարցերը ենթակա են սահմանադրական դատարանին,

• դիմողն իրավասու է դիմել սահմանադրական դատարան,

• դիմումում առաջադրված հարցի վերաբերյալ առկա չէ սահմանադրական դատարանի որոշում ,

• դիմումի առարկայի վերաբերյալ այլ դիմումի հիման վրա սահմանադրական դատարանում գործի դատաքննություն չի իրականացվում,

• դիմողը սպառել է դատական պաշտպանության բոլոր միջոցները: Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 31-րդ և 69-րդ հոդվածներով` ՀՀ սահմանադրական դատարանի թիվ 2 դատական կազմը

Ո Ր Ո Շ Ե Ց.

1. Քաղաքացի Արման Այվազյանի դիմումի հիման վրա` ՀՀ քրեական օրենսգրքի 315- րդ հոդվածի 1-ին մասի և ՀՀ քրեական դատավարության օրենսգրքի 309-րդ հոդվածի 2-րդ մասի` ՀՀ Սահմանադրությանը համապատասխանության հարցը որոշելու վերաբերյալ անհատական դիմումով գործն ընդունել քննության:

2. Սույն գործով դատավարությանը որպես պատասխանող կողմ ներգրավել ՀՀ Ազգային ժողովին:

Նախագահող`

Անդամներ`

24 հունիսի 2014 թվականի

ՍԴԴԿՈ/2-6