ԼԵՎՈՆ ԲԱՐՍԵՂՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆ

ԴԱՏԱԿԱՆ ԿԱԶՄԻ ՈՐՈՇՈՒՄ

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՎԵՐԱԲԵՐՅԱԼ

Քաղ. Երևան 11 փետրվարի 2021թ.

Հայաստանի Հանրապետության սահմանադրական դատարանի

դատական կազմը`

Նախագահությամբ Ա. Խաչատրյանի

Անդամակցությամբ Ա. Թունյանի

Ա. Վաղարշյանի

Քննության առնելով Լևոն Բարսեղյանի անհատական դիմումի

ընդունելիության հարցը,

ՊԱՐԶԵՑ.

Լևոն Բարսեղյանը (ներկայացուցիչներ փաստաբաններ Ա. Մելքոնյան և Ն. Հակոբյան) դիմել է Սահմանադրական դատարան (դիմումը Սահմանադրական դատարան է մուտքագրվել 2021 թվականի հունվարի 22-ին) խնդրելով. «…. «Պետական տուրքի մասին» ՀՀ օրենքի 22-րդ հոդվածի 1-ին մասի թ կետի 5-րդ ենթակետը, այն մասով, որ մասով նախատեսում է պետական տուրք վճարելու արտոնությունից բացառություն ճանապարհային ոստիկանության կողմից ընդունված որոշման դեմ բողոքներով, ճանաչել Սահմանադրությանը հակասող և անվավեր»:

2. Դիմողի կարծիքով «Պետական տուրքի մասին» օրենքում կատարված այն փոփոխությունը (փոփոխությունը կատարվել է 2019 թվականի դեկտեմբերի 9-ի ՀՕ-305-Ն օրենքով և ուժի մեջ է մտել 01.01.2020 թվականին), որի համաձայն ճանապարհային ոստիկանության կողմից ընդունված որոշման դեմ բողոքներով դիմողները չեն ազատվում պետական տուրքի վճարումից, սահմանափակում է անձանց, տվյալ դեպքում դիմողի դատարան դիմելու հնարավորությունները: Իր կարծիքը դիմողը փաստարկում է նրանով, որ նույնիսկ նվազագույն աշխատավարձի 1000 դրամի չափով տուգանք նախատեսող վարչական տույժը բողոքարկելու նպատակով անձը պետք է վճարի նվազագույն աշխատավարձի քառապատիկի 4000 դրամի չափով պետական տուրք: Նման իրավակարգավորումն, ըստ դիմողի, անհամաչափ է և հակասում է Մարդու իրավունքների եվրոպական կոնվենցիայով և Սահմանադրությամբ երաշխավորված դատարանի մատչելիության և սեփականության իրավունքներին:

3. Ուսումնասիրելով սույն անհատական դիմումը և վերջինին կից ներկայացված դատական ակտերը, ղեկավարվելով «Սահմանադրական դատարանի մասին» սահմանադրական օրենքի 29 և 69-րդ հոդվածների պահանջներով Սահմանադրական դատարանի դատական կազմը գտնում է, որ սույն դիմումով գործի քննությունը ենթակա է մերժման հետևյալ պատճառաբանությամբ. սույն գործով վերջնական դատական ակտը «Վճռաբեկ բողոքը վարույթ ընդունելը մերժելու մասին» որոշումը, Վճռաբեկ դատարանի կողմից կայացվել է 2020 թվականի հունիսի 24-ին: «Նորմատիվ իրավական ակտերի մասին» օրենքի 31-րդ հոդվածի 2-րդ մասի համաձայն տարիներով, ամիսներով կամ օրերով հաշվարկվող ժամկետների ընթացքն սկսվում է այն օրացուցային տարվա, ամսվա, ամսաթվի կամ վրա հասած իրադարձությանը հաջորդ օրվանից, որով որոշված է դրա ժամկետի սկիզբը: Տվյալ դեպքում, հաշվի առնելով այն հանգամանքը, որ դիմողի վերաբերյալ գործով վերջնական դատական ակտը կայացվել է 2020 թվականի հունիսի 24-ին, Սահմանադրական դատարան դիմելու համար «Սահմանադրական դատարանի մասին» սահմանադրական օրենքի 69-րդ հոդվածի 3-րդ մասով սահմանված ժամկետի ընթացքը սկսվում է 2020 թվականի հունիսի 25-ից և ավարտվում 2020 թվականի դեկտեմբերի 25-ին: Մինչդեռ, Լևոն Բարսեղյանի դիմումը փոստային բաժանմունքին է հանձնվել 2021 թվականի հունվարի 20-ին: Հետևաբար` դիմողը բաց է թողել Սահմանադրական դատարան դիմելու համար սահմանված վեցամսյա ժամկետը, ինչը հիմք է անհատական դիմումի հիման վրա գործի քննության ընդունումը մերժելու համար: Ելնելով վերոշարադրյալից և ղեկավարվելով «Սահմանադրական դատարանի մասին» սահմանադրական օրենքի 29-րդ հոդվածի 1-ին մասի 6-րդ կետով, 69-րդ հոդվածի 3 և 5-րդ մասերով Սահմանադրական դատարանի դատական կազմը

ՈՐՈՇԵՑ.

Լևոն Բարսեղյանի անհատական դիմումով գործի քննությունը մերժել:

Նախագահող Ա. Խաչատրյանի

Անդամներ Ա. Թունյանի

Ա. Վաղարշյանի

11 փետրվարի 2021 թվականի

ՍԴԴԿՈ-6