ՍԱՄՎԵԼ ՄՆԱՑԱԿԱՆՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 1 ԴԱՏԱԿԱՆ ԿԱԶՄԻ

Ո Ր Ո Շ Ո Ւ Մ Ը

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

Քաղ. Երևան

25 հունիսի 2012թ.

Հայաստանի Հանրապետության սահմանադրական դատարանի

թիվ 1 դատական կազմը

Նախագահությամբ Ա. Պետրոսյանի

Անդամակցությամբ Վ. Հովհաննիսյանի

Վ. Պողոսյանի

Ուսումնասիրելով քաղաքացի Սամվել Մնացականյանի

անհատական դիմումով գործը քննության ընդունելու մասին հարցը,

Պ Ա Ր Զ Ե Ց.

Համաձայն ՀՀ Սահմանադրության 101-րդ հոդվածի 1-ին մասի 6-րդ կետի քաղաքացի Սամվել Մնացականյանը 2012 թվականի հունիսի 6-ին դիմել է ՀՀ սահմանադրական դատարան խնդրելով.

«Հայաստանի Հանրապետության Սահմանադրության 3, 5, 18, 19, 43, 91, 92 և 93, 94, 97-րդ հոդվածներին հակասող և անվավեր ճանաչել ՀՀ «Դատական» օրենսգրքի 111-րդ հոդվածի 6-րդ մասի «Դատավորին կարգապահական պատասխանատվության ենթարկելու մասին Արդարադատության խորհրդի որոշումները,» դրույթը, Հայաստանի Հանրապետության Սահմանադրության 3, 5, 18, 19, 43, 91, 92 և 93, 94, 97-րդ հոդվածներին հակասող և անվավեր ճանաչել ՀՀ «Դատական» օրենսգրքի 158-րդ հոդվածի 1-ին մասը,

սահմանել, որ դիմողի նկատմամբ կայացված վերջնական դատական ակտը նոր հանգամանքի ի հայտ գալու հիմքով ենթակա է վերանայման օրենքով սահմանված կարգով»։

Ներկայացնելով «դատական իշխանություն», «դատարան», «արդարադատություն», «դատական ակտ» եզրույթների սահմանադրաիրավական բովանդակությունը դիմողը կարծում է, որ արդարադատության խորհրդի կայացրած դատավորին կարգապահական պատասխանատվության ենթարկելու վերաբերյալ որոշումը զուրկ է դատական ակտի պարտադիր կատարման ենթակա լինելու սահմանադրաիրավական պահանջից։ Ըստ դիմողի արդարադատություն իրականացնելու և որպես դատարան գործելու գործառույթ ՀՀ Սահմանադրությամբ արդարադատության խորհրդի վրա դրված չէ։ Այն նախատեսված է վիճարկվող իրավադրույթներով, ինչը հակասում է ՀՀ Սահմանադրության 91, 92, 94.1 և 95-րդ հոդվածներին։

Խնդրո առարկա անհատական դիմումի նախնական ուսումնասիրության արդյունքները վկայում են, որ դիմողը պահպանել է ՀՀ սահմանադրական դատարան դիմելու «Սահմանադրական դատարանի մասին» ՀՀ օրենքի պահանջները, այն է

• դիմումում առաջադրված հարցը ենթակա է սահմանադրական դատարանին.

• դիմողն իրավասու է դիմել սահմանադրական դատարան.

• դիմումում առաջադրված հարցի վերաբերյալ առկա չէ սահմանադրական դատարանի որոշում.

• դիմումի առարկայի վերաբերյալ այլ դիմումի հիման վրա սահմանադրական դատարանում գործի դատաքննություն չի իրականացվում.

• դիմողն սպառել է դատական պաշտպանության բոլոր միջոցները։ Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 31-րդ և 69-րդ հոդվածներով ՀՀ սահմանադրական դատարանի թիվ 1 դատական կազմը

Ո Ր Ո Շ Ե Ց.

1. Քաղաքացի Սամվել Մնացականյանի անհատական դիմումով գործն ընդունել քննության։

2. Սույն գործով դատավարությանը որպես պատասխանող կողմ ներգրավել ՀՀ Ազգային ժողովին։

Նախագահող

Անդամներ

25 հունիսի 2012 թվականի

ՍԴԴԿՈ/1-16