ԱՐՍԵՆ ԲԱԲԱՍՅԱՆԻ ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ԹԻՎ 1 ԴԱՏԱԿԱՆ ԿԱԶՄԻ

Ո Ր Ո Շ Ո Ւ Մ Ը

ԱՆՀԱՏԱԿԱՆ ԴԻՄՈՒՄԻ ԸՆԴՈՒՆԵԼԻՈՒԹՅԱՆ ՀԱՐՑԻ ՎԵՐԱԲԵՐՅԱԼ

Քաղ. Երևան

12 հուլիսի 2016թ.

Հայաստանի Հանրապետության սահմանադրական դատարանի

թիվ 1 դատական կազմը`

Նախագահությամբ Ա. Պետրոսյանի

Անդամակցությամբ Ֆ.Թոխյանի

Ա. Թունյանի

Ուսումնասիրելով Արսեն Բաբասյանի

անհատական դիմումի ընդունելիության հարցը,

Պ Ա Ր Զ Ե Ց.

Համաձայն ՀՀ Սահմանադրության 101-րդ հոդվածի 1-ին մասի 6-րդ կետի` Արսեն Բաբասյանը դիմել է ՀՀ սահմանադրական դատարան` խնդրելով.

«հակասահմանադրական և ՀՀ Սահմանադրության 5-րդ հոդվածի 3-րդ մասին 28-րդ հոդվածի հետ համադրությամբ և 1-ին հոդվածին հակասող և անվավեր ճանաչել ՀՀ քաղաքացիական դատավարության օրենսգրքի 231-րդ հոդվածի 2-րդ մասի 3-րդ կետի դրույթը, այնքանով որքանով այն վճռաբեկ բողոք ներկայացրած անձի համար նախատեսում է ՄԻԵԴ-ի կողմից կայացված դատական ակտը կցելու ձևական (ֆորմալ) պահանջ»:

Դիմողը գտնում է, որ վիճարկվող դրույթով սահմանված վճռաբեկ բողոքին կից Մարդու իրավունքների եվրոպական դատարանի կողմից կայացված դատական ակտը կցելու պահանջն ակնհայտորեն հակասում է iura novit curia սկզբունքին և, հետևաբար, նաև`իրավական պետության հիմնարար սկզբունքին:

Ըստ դիմողի` դատարանը պարտավոր է տիրապետել կիրառելի իրավունքին, այլ ոչ թե այն պահանջել կողմերից (բացառությամբ օտարերկրյա իրավունքի և օրենսդրության կիրառման դեպքերի): Հակառակ իրավիճակը խարխլում է դատական իշխանության արդյունավետությունը:

Ղեկավարվելով «Սահմանադրական դատարանի մասին» ՀՀ օրենքով և ելնելով խնդրո առարկա անհատական դիմումի և կից փաստաթղթերի նախնական ուսումնասիրության արդյունքներից` գտնում ենք, որ դիմումի հիման վրա գործի քննության ընդունումը ՀՀ սահմանադրական դատարանի կողմից ենթակա է մերժման` հետևյալ պատճառաբանությամբ. խնդրո առարկա անհատական դիմումով վիճարկվող ՀՀ քաղաքացիական դատավարության օրենսգրքի 231-րդ հոդվածի 2-րդ մասի 3-րդ կետով առաջադրված հարցի վերաբերյալ առկա է ՀՀ սահմանադրական դատարանի 2016 թվականի հուլիսի 12-ի ՍԴՈ-1293 որոշումը, ինչը, որպես գործի քննությունը մերժելու հիմք, ամրագրված է «Սահմանադրական դատարանի մասին» ՀՀ օրենքի 32-րդ հոդվածի 3- րդ կետով:

Ելնելով վերոգրյալից և ղեկավարվելով «Սահմանադրական դատարանի մասին» ՀՀ օրենքի 32-րդ հոդվածի 3-րդ կետով` ՀՀ սահմանադրական դատարանի թիվ 1 դատական կազմը

Ո Ր Ո Շ Ե Ց.

Արսեն Բաբասյանի անհատական դիմումով գործի քննության ընդունումը մերժել: Նախագահող

Անդամներ

12 հուլիսի 2016 թվականի

ՍԴԴԿՈ/1-22